我係一個好俗世嘅「耶穌o靚」！

呢排都好懶，又貪玩， 掛住去玩都無乜番教會番團契。 其實對於我黎講，番團契番崇拜都係好似去啲家族聚會，阿爸阿媽叫到，要求出席露面，唔想佢哋唔開心咁咪去囉！ 你話真係好想去呢就一定唔會囉！

去到又要好守規矩，講嘢又要好小心咁。人人都好似好乖，又好多人好似講緊文言文咁，你好似明明哋佢哋講乜，但又搭錯線咁。我就不嬲好世俗嘅，嗰啲「我會為你禱告」, 「神會祝福你」, 「啊！太好啦！ 真係神嘅恩典」呢啲教會用語我咁多年都唔係好講得出口，人地講我都覺得毛管戙，覺得同呢種星球人有啲格格不入。 我係知點解佢哋會咁，亦明白佢哋都係想話俾你聽佢哋關心你，想俾啲正能量你，但係硬係會令人卻步囉。

作為耶穌嘅忠實Fans, 我跟咗呢個大佬咁多年，都知佢係堅嘅。佢幫咗我好多，令我改咗好多嘢。我係對佢死心塌地嘅，唔會再跟第二個大佬嘅。但係我聽到其他o靚咁講嘢，我都覺得有啲怪怪地，更何況未跟耶穌嗰啲人呢？ 有時你講得幾華麗，幾富有宗教色彩，啲人反而會驚囉！ 不如唔好講咁多廢話，做吧啦！ 例如，唔洗出聲話幫人祈禱, 直頭馬上靜靜哋幫佢祈啦！你講話神會祝福你，你不如好好哋give a hug, 再幫佢哋解決問題啦！

你要踢人入會啊都要令嗰個人唔好有反感先，見到你哋入咗會變得神神化化， 講嘢都好似穿越咗咁，係人都唔想入啦！ 所以，輝哥，小芸， Emily係我心入面最正嘅耶穌代言人! 佢哋唔講嗰啲「密碼」, 只係做同埋幫你，仲要幫完你不問回報嗰下先正嘛！佢哋真係掂呀！
。
。
。
後話： 神啊！ 我知你唔會怪我咁講嘅，我係不嬲都同你其他o靚唔同架啦！我知你都咁睇我嘅，你就由得我咁啦！ 個個靚都一樣，你都悶啦！ 係咪？