有人話女人嘅一生係俾男人累嘅，但係女人亦可以好自强

今晩同朋友Michelle食飯，聽到佢講述佢兩段唔好嘅婚姻，遇到兩個渣男. 一個打佢又搞女人，對仔女又唔好，另一個有情緒病，暴躁，欠債，係佢有癌症嘅時候都唔照顧體諒佢。唉。。。聽到佢咁坎坷嘅遭遇，雖然佢講得好輕鬆，但都聽到我心都噏埋。

我從一開始認識Michelle, 就知道佢過去有一段唔好嘅婚姻，一個人獨立湊大一對仔女，而我永遠見到佢都係嘻嘻哈哈，好開朗好開心，時日搞笑， 好似無乜嘢。我知道佢係一個好強嘅女人，佢嘅爽朗嘅性格我相信會吸引好多男人。但佢就無興趣搵過第三春，一來佢覺得無咁嘅需要，佢覺得自己而家幾好，自由自在，二來佢亦唔想再令自己再跌入另一段再令自己心力交瘁嘅婚姻。

有其他朋友不停鼓勵佢再搵第二春，等老咗嘅時候有依靠，平時又有個伴，有個人陪下，鬧交都有對手。但係我覺得好似Michelle咁獨立，咁叻，咁堅強，佢未必想生活係別人嘅陰影底下，唔好講陰影咁負面，講樹蔭下啦！大樹好遮蔭，有個男人挨吓對于Michelle黎講都係唔敢去諗嘅事。我諗無女人唔想嘅，但係如果再黎一段咁爛嘅婚姻，如果我係Michelle, 我有事業，有朋友，有仔女，過得好地地，點都唔會踩番隻腳落去囉！

女人當自强係現今呢個社會有咩唔好，有咩唔得？ 女人而家做到好多男人都做到既嘢，亦可以好有智慧咁去選擇適合自己嘅嘅生活，開心最重要。我當然係希望Michelle可以幸福開心咁生活落去，如果有一個好男人可以拖住佢隻手一齊行落去，我會戥佢好開心! 但如果遇唔到, 都唔緊要，我相信Michelle都會好聰明咁開心過每一日，送上我無限嘅祝福。