媽咪!生日快樂!

今日係我最愛嘅媽咪嘅生日! 🎂 🎊 🎉

祝媽咪生日快樂，青春常駐，身體健康!

我同媽咪真係。。。唉好難講我哋嘅感情。。。而家當然係好啦！但係之前一直都係夾集恩怨情仇。

我由細都大，甚至到現在，都係覺得我係我爸爸媽媽心目中係無乜地位。我阿爸重男輕女，好傳統。我阿媽都有呢個觀念，但更重要嘅係我媽咪好愛我DADDY! 係唔可以冇咗佢，好依賴佢，做咩都要同我阿爸一齊嘅。係佢心目中，我DADDY係第一位，細佬係第二位，第三位可能先到我。。。或者都未到，仲有我阿姨，姨媽，舅父s先到我都唔出奇。

我記得我細細個已經同佢有仇，佢會時日用啲好變態嘅方法罰我，例如，佢會罰我踎係個廁所上面，唔係廁板上，係個磁磚個兜上面，我記得我一個人仔要搵啲腳趾夾住個兜邊，好辛苦，一攰得滯跳落地，佢打到我跳番上去踎，直到佢條氣順番。又試過佢明知我怕龜，偏偏將隻龜放係我腳邊就周圍行，我梗係嚇到v嘩鬼叫啦！佢就睇住我係啲凳度跳黎跳，然後狂笑。其實仲有好多變態嘅懲罰方法，不能盡錄。其實我當時真係好受傷害，我時日諗點解媽咪你會咁對我？ 你唔係教好我，係虐待我，你罰親我嘅嘢都同我錯嘅嘢冇關，甚至有時我冇錯，你都搵理由糟質我。

我一入大學，可以話鬆毛鬆翼，時日走出去玩，識男朋友！佢唔俾我入屋咩，我又搵到人收留我喎。佢當時都冇我符，我又畢到業，又自己搵到嘢做，唔洗靠屋企。到咗畢業，我連畢業禮都唔行，自己訂機票番香港。我記得我係走之前兩個禮拜先通知我阿爸阿媽。佢哋唔俾架，但我要脫離佢地，你哋唔錫我，我搵男朋友錫我。我咁就離開佢哋身邊都今時今日，20年啦。。。

其實我返到香港做嘢之後，我同佢地既關係好咗好多，同媽咪都冇鬧交，打電話番去有時都會喊，因為自己一個覺得好孤單，所有野都要自己做自己孭，係香港做嘢壓力又大。我開始想念我阿爸阿媽。我大大吓開始明白佢地既生活唔容易，我自己照顧自己一個都覺辛苦，更可況佢地一家大細，仲要deal with我呢件頂心杉! 我開始想見多啲佢哋，所以每一次佢哋番香港，我都會請假陪佢哋，爭取同佢哋一齊嘅時間，唔會同佢地嗌交，頂嘴。

雖然係咁，都唔代表我覺得佢哋好錫我，尤其係我阿媽。

我記得我做完心臟手術之後幾個月，佢地過去NZ探我，當時我發現勞子又第二個，我要離婚。當時，我老爺奶奶阿爸阿媽都係度，我喊住咁翳我阿爸阿媽帶我走，我阿爸話我番去多倫多屋企冇問題，佢歡迎我返屋企。但我大個女，唔可以話走就走，要處理好係NZ所有嘢先走。我話可以，於是求媽咪可唔可以係度陪我陪到我搞掂啲嘢先走？ Daddy要返多倫多開工。媽咪當時好大反應咁話「唔制! 唔要! 我唔要係度!」 我當時呆咗。我好hurt,  你個女咁慘，仲有自己一個孤單隻影，無人無物，呢個時候最需要親人嘅支持，你竟然劈低你個女一個人獨自係度面對所有嘢？！ 我當時真係覺得，我情願死咗去。老公鍾意咗第二個，我阿媽唔理我死活，我個心臟又有事，真係三重打擊。😢

呢件事係我心入面係一條橫樑咁塞係度，媽咪當時嘅反應真係瀝瀝在目，無辦法忘記。我之後幾年都好少打電話番去，亦好少見佢哋，就算我同勞子好番我都唔理佢。直到有一次，媽咪打電話黎投訴我好少打番去，我終於爆啦！ 我同佢講我真係好傷心，點解佢會咁對佢個女我。佢喊住咁同我say sorry, 佢話佢當時係真係怕要離開Daddy，佢冇咗Daddy係身邊會唔知點算，一諗到要同Daddy分開，佢當時就好驚，就馬上話「唔制！」佢同我講，一個女人好似佢咁一拍拖就結婚，結完就生仔，個老公係佢既一切，仔女都唔及老公親。佢仲話，我哋個個都會有自己家庭，到佢老咗邊個會陪伴佢到老？ 邊個會一直係佢身邊，係佢床邊？ 只會係佢老公我Daddy，唔會係我同細佬。佢講完之後，我冇嬲佢啦。。。我明白啦，亦理解，因為我都係結咗婚，有老公嘅人。

媽咪係好愛佢老公，我應該要明白佢理解佢，我亦要尊重佢，對於佢黎講，我同我細佬係小三，小四，有人同佢爭寵,. 佢一定唔開心啦，心理唔平衡啦，咁唯有蝦個小三小四囉！ 但佢又知自己個老公好錫個小三，怕老公知道而怪罪，唯有恰個唔係咁得寵嘅小四，即係我囉！ 所以佢湊大我同細佬係好唔容易。

我冇嬲我媽咪啦！ 佢都係太愛佢老公啫! 佢已經盡佢嘅力去錫我，我唔可以咁自私咁要求佢，對佢嚟講太唔公平啦。。。而坦白講，我亦冇盡我做女既責任去好好對佢，咁我又憑乜嘢咁要求佢呢？

我而家淨係知道，我DADDY媽咪係呢個世界唯一同我有100%血源關係嘅人，係同我最有關係嘅人, 我無下一代，所以佢地對我黎講係好重要嘅。就算之前有咁多恩怨情仇，都唔重要啦，都一把年紀啦。。。最緊要係佢地仲健在。神啊！ 我求你賜健康，平安，快樂俾我Daddy媽咪，我希望可以對多佢地好多年。Amen!