Rajio Japanese Public House 初體驗

溫哥華啲日本餐又多，又好食又正宗就係人都知，我就唔識係唔係正宗，我冇好似我班去日本當番鄉下嘅friends咁識食，我淨係知道我鍾唔鍾意食。

講真嗰句，黎到溫哥華， 眼界係開闊咗嘅，識咗好多新嘢又試咗好多之前係NZ未食過嘅食材，例如魚生或壽司嘅種類。我之前係NZ未食過Saba, Hamachi, Toro, Aburi Battera sushi, Negitoro maki, Hotate and Mentai Nigiri. 亦唔會時日有Ikura, Ika。Uni我係NZ未食過㖭啦！仲有呢邊食日本嘢比較係NZ都唔係好貴，係NZ真係你有錢都冇得食，因為入口管制得嚴重。所以，我同勞子係每個禮拜都會食一餐日本嘢。

今朝佢話佢想食拉麵。我馬上search Instagram搵#yvrramen, 我就俾一張相吸引咗。有人post咗一碗拉麵同埋一份Saba Aburi Battera Sushi出黎!!! 嘩! 我兩眼發光，Saba啊！仲要係炙り 同埋板壓寿司啊！於是我哋就決定今日我一放工就衝去食!

我哋五點鐘到Rajio，佢哋都未開始營業但門係打開咗(開5：30PM)但可以俾我哋訂位先，不過有時間限制。侍應小姐話我最遲要7：00PM交番張枱俾佢哋，我梗係話冇問題啦！之後我同勞子5:29pm到，間鋪好靜好靜，有個男侍應哥哥好panic, 係咁話“噢？你地到咗啦？ 我哋未開門啊！一分鐘一分鐘! 你哋出返去等啦!” 我O晒咀! 心諗“吓？都冇人! 可以帶我地坐低先啫。。。 仲有一分鐘啫! 洗唔洗咁緊張？！？！？”

點知1分鐘後，全間鋪啲人好似上哂身咁，講哂口號咁， 仲聽到啲切嘢聲洗嘢聲，成間鋪開始嘈，好似啲摩打撻着咗咁全間鋪開似運作。呢個咁大既對比對于我黎講係有啲震撼。我冇怪佢哋之前既舉動，我反而覺得佢哋好professional, 佢地係想俾100% 服務俾顧客，將佢哋嘅心放係工作到，俾你感受最傳統熱鬧輕鬆嘅居酒屋體驗。我feel到佢地既熱情同敬業樂業。係我唔啱，我唔應該去打擾佢哋係度預備，就好似我未化完妝，有人要撞入黎睇到我未ready嘅一面，嗰種尷尬及不自在。

講咗一大堆嘢，咁食物又點呢？值唔值得去呢？ 其實，我真係無資格講。因為我冇試哂成個menu, 我淨係試咗三樣嘢。Heavenly Sweet Shrimp Miso Ramen, Aburi "Shime-Saba” Battera, 同埋Fresh Seafood Chirashi-Zushi.

個拉麵嘅味度係似一個馬拉+日本Fusion嘅拉麵，一入口啖湯嗰個沖擊感係好正，好蝦麵feel, 但係好complicated嘅一個味道，飲多幾啖開始feel到啲miso味，好濃好濃，係好飲嘅個湯，不過如果我要飲蝦湯，我會揀馬來西亞蝦麵，會再鮮啲香啲。而啲麵係正常粗度嘅麵，微攣，所以啲湯係掛得住，攝得住係啲麵度，而食到最尾都未係好諗，所以會加分。個叉燒就差少少，同成個麵and湯唔係好夾咁，好咸，以為煮得好入味，但又未係好諗，入口即化嗰種，冇乜特別。都係嗰句，我會prefer馬來西亞或星加坡蝦麵，起碼啲湯香鮮啲，的配料夾好多。呢個拉麵我諗我唔會再食。

個鯖魚炙り 板壓寿司，我覺得要一試! 我覺得怕呢隻魚個腥味嘅人都可以試下，呢隻壽司好香好鮮好肥美，個腥味變咗做一個好獨特嘅香味，個醬汁微甜令到本身用鹽醃過嘅魚變得好鮮甜，而燒一燒令到佢特別肥美! 我覺得係好食嘅, 對食Saba新手嘅朋友，呢個係絕對入門之作，我覺得食完之後，應該好多唔鍾意鯖魚嘅人都唔會抗拒鯖魚，反而會有啲愛上佢。我未係日本食過，但呢個暫時已經可以滿足到我啦。不過我知道鯖魚炙り 板壓寿司有好多地方有做，下次我去第二間試吓。

最後嘅魚生飯，我真係唔係好recommend, 啲魚有好多渣，又唔鮮。係有好多唔同種類嘅魚生，但係唔新鮮。我食左兩啖就無興趣，成碗比勞子填肚。佢係一碗冇乜特點嘅魚生飯，令到我冇乜印象，淨係覺得啲魚有渣。唔推介!

Overall, 雖然我對佢某啲嘢會讚，但我諗我唔會再黎，一來遠，二來類似呢種居酒屋溫哥華大把，能代替佢嘅，包括價錢，服務，食物質素及車程都比佢優勝嘅有好多，我無必要去呢間。佢亦冇一個令我非去不可嘅理由，都冇一個令我上癮，非食不可嘅食物，所以我冇必要山長水遠黎食。

不過我同勞子都有一個愉快嘅晚上，因為Rajio嘅氣氛令我哋好relax, 傾咗好多計，好sweet嘅，特別過咗琴晚嘅"洗碗碟機事件"，所以我都要感謝Rajio嘅。

地址： 3763 W.10th Ave. Vancouver, BC V6R2G7
電話：604-558-1679