最近迷上食螺螄粉!!!

我不嬲都鍾意食辣，無辣不歡，雖然中醫叫我唔好食咁多，我體質唔係咁適合食辣，但我真係忍唔到。我已經少食咗啦！以前餐餐都要有辣，而家都係間唔中先食。我最鍾意湖南嘅香辣，四川嘅麻辣，食辣最緊要過癮! 食到出晒汗咁就覺得好爽。

我自問都食到幾辣吓，我契仔個湖南老竇都話我食辣同佢地湖南人有得揮，我諗我係味蕾麻木咗。。。有唔食得辣既朋友話過唔好信我講，話啲嘢食唔辣，因為我覺得唔辣，佢話辣到飛起，所以佢地覺得我無咗味蕾。

但我食得辣嘅“大名”被打擊啦😖😖😖！ 我俾隻叫『螺螄粉』嘅辣湯米線難倒! 我竟然覺得佢好好好辣，唔敢落哂成包辣油，其實連落一滴都唔敢! 但係，我又好鍾意食。。。我真係時日都掛住佢！ 心思思想食!

螺螄粉係柳州名產，我初頭喺YouTube見到好多人食，好多人挑戰，話好好食，咁我咪去買兩包唔同牌子試吓囉！第一次食, 簡直係Nightmare! 首先，一開始煮，酸酸叔叔，成間屋都臭，仲臭醒咗勞子。佢問我係咪嘔定係瀨屎! 我跟祝Instructions落晒所有材料住，包括先落米線煮10分鐘，落螺螄湯汁，再加酸筍，酸豆，炸菜，炸腐皮，花生，最後落成包辣油。煮完之後, 個樣好吸引，食咗一啖，正! 夠辣! 刺激! 但第三啖開始，我無辦法食晒成碗，好辣!!! 好Q辣!! 好似飲火酒咁乸個口控同個喉嚨。 我食咗半碗，忍唔住要“片”就啲油，再加多啲熱水溝稀啲，同勞子share先食得哂! 食完要去沖涼，因為食完成身汗, 仲有勞子係咁話我個身聞落好似飲酒劏完再跌咗落坑渠咁嘅味。吹到啤一聲😡😡😡!!!!! 我之後仲拍枱誓神劈願咁話唔再食!!!

但係神推鬼㧬係YouTube都仲有好多人話好食，話唔落包辣油就得，又話『柳全』及『好歡螺』最好食，其他冇得比。我睇睇個櫃，咦？我上次唔係食『柳全』喎! 我仲有一包『柳全』係嗰櫃入面! 我係度諗，上次覺得難食，唔代表『柳全』難食吖？咁於是我決定挑戰多一次，話哂都CAD4.99一包，唔好嘥嘢嘛！

一見到個Package, 就覺得唔同啲，佢係比另外嗰包大包啲嘅。我唔記得咩牌子，但個包裝上面有話攞啲咩咩咩獎咁囉！一打開，入面好多配料，有誠意好多! 首先包米線大包啲，酸筍，酸豆炸菜大條大粒啲，實淨啲，唔係一pat pat咁，好明顯係一條條一粒粒，仲有我最欣賞嘅揸豆皮，好大包，同埋真係鬆脆，好似炸響鈴，立體一舊舊，唔似其他幾隻牌子(我之後有試埋其他牌子)咁扁tat tat細細幾塊咁。仲有佢包螺螄湯汁係有螺仔加湯汁架! 係有螺仔肉架! 幾有誠意呀！

今次我冇加個包辣油，上次唔知死咩😖😖😖😖？!

嘩! 同上次差好遠! 『柳全』好食好多，鮮辣酸香都有，冇上次咁臭，酸味都冇咁搶，辣度完全入得口，係絕對過癮嘅辣! 上次真係受罪，今次係享受。勞子都話呢包好好食，不過對於佢黎講都係臭臭哋，不過唔似嘔+跌落坑渠，似鹹魚嗰啲臭，係食物嘅味。佢忽發奇想，用清水過一過啲酸筍，酸豆，炸菜會唔會好啲，冇咁臭呢？ 係得嘅，真係無咁臭。再加上煮緊嘅時候開大個抽油煙機，煮完屋企就唔係好臭啦！

其實之後我買哂係溫哥華華人超市有嘅螺螄粉番屋企試，真係唔及『柳全』咁好味。其他嗰啲唔係個米線太諗就係削嘅，有好多包又太咸，冇鮮味，有啲又真係臭得滯，同埋所有配料到係俾三四條，三四舊俾你，有啲配料好似mash咗咁，一pat pat。『柳全』係各方面都優勝，真係無得輸！

而家最可惜嘅係未試到螺螄粉之王『好歡螺』，啲Youtubers話最好食係佢! 等我叫個同事番去大陸探親時幫我買兩包試吓先!

螺螄粉繼辛辣麵之外，將會長駐我屋企個廚櫃! ✌✌✌✌✌